لقد خذلنا السودانيين من الشباب والضباط العرب ، على الرغم أن مواقف من يشابهونهم تبدوا ممتازة إلى حد ما ، تجاه الحكومة السودانية ، إلا أننا لانستطيع أن نغامر بوضع الأمور في أيديهم. ،، تحت أيدي الأفندية ….

  مستر ماك مايكل

 

 

 

 

 

 

 

 

 

 

 

 

 

 

 

 

 

 

 

 

 

 

أركيو لوجــيــا الأفــــــنــديــــــة  

 

 

 

 

 

             مــحـــمـــد الــســـــنــي

             خــلـف الــلــه امــــيـن

 

الممثلون حسب الظهور:

الراوي: وهو في نفس الوقت قائد الجوقة

ريم

ملاذ

جمال                             الجـــوقـــة

عادل

وائل

مازن

ناصر

مهند

المغني : خليل فرح

العازف : وهبة .. عازف الاكورديون

أفندي 1 و2 و 3 ـــ يمكن ان يمثلهم ممثل واحد

 افندي 1 مشهد الجراد 2 مشهد الشربة الانداية3قاتل التمساح

امونا كابوسي : هو ممثل من جنوب السودان يحمل عروسة ويحكي

                 الحكاية بواسطة العروسة وهو ممثل شامل وراقص

علي عبداللطيف

الأفندية ـ صالح وعبيد و حسين يرتدون بدل سوداء قميص

           وطربوش وكرافتات متنوعة بين بابيون وفراشة وكرافت عادي

الجوقة يمكن ان تكون 6 اشخاص وهي تمثل الشعب

 

المسرح خال يمين المسرح طاولة صغيرة عليها اكورديون وعود وعلى      يسار المسرح طاولة اكبر حولها 3 كراسي وطربوش في وسطها في   الخلفية مدرجات شعبية يجلس عليها الشعب يدخل الراوي ويحي الجمهور بود ويسلم علي كل من يعرفه باسمه لنتوه هل المسرحية اليوم ام امس

الراوي : السلام عليكم . جيَتكم بالدنيا ، تخليني اشعر انو قريب نتوحد بي هوية واحدة سودانية ، زي ما بدينا في كوش . لكن المسألة بقت معقدة ، ومحيرة . مجرد ما خلاص الإنجليز بقوا طالعين من سودان العزة . قنطرونا في كيمان شئ شيوخ وعمد ، نظار وزعماء قبائل ، واسياد وافندية ..

اها ظهرت الشعارات.. وحدة وادي النيل ، السودان للسودانيين ، والاتحاديين ، وكمان في الهتفوا ،، عاش البريطانيين وعدلهم ، عاش السودان ، وحكام السودان والانجليز ، وعاش اشراف السودان تحت حماية صاحب الجلالة الملك جورج الخامس ، ملك بريطانيا العظمى ، والهند والسند ، والسودان الانجليزي ..ياحليلنا وياحليلي .ياحليلي…

تدخل الجوقة

 وهي تنشد : حليلي يا حليلي

              حليلي يا حليلي

تتقاطع الجوقة لتستقر وسط الخشبة بتوزيع يتيح لها الحركة بجمالية ..

    حليلي حليلي

    حليلي يا حليلي

جمال : حليلي القلب انشوى

       حليلي انا البايت القوى

 حليل الا طب لادوا

وكتمة ما شامي الهوا

حليلي يا حليلي

حليلي يا حليلي

عادل : حليلي أنا المصلوب في المكان

        حليلي انا الفايتو الزمان

      حليلي لاباشا لابك لا افندي

    حليلي الفاقد الاتجاه

حليلي يا حليلي

حليلي يا حليلي

ريم : حليلي الا سقف لا صريف

     حليلي وباكر جاي الخريف

     حليلي فارقت اختي وشوق اخوي

    حليلي لا يد تتمسك تملا اييد

 حليلي لاتمسح الراس صاحبو عيد

   حليلي لاتلبس الافراح توب جديد

 الجوقة حليلي يا حليلي

   حليلي يا حليلي

حليلي المصارع المعاش بالفتات والدراش

الجوقة : حليلي ، الهاجروا وخلوني ياحليلي

الراوي : يا طير الهجرة يا طاير

            يا طيرا وجهته بلادي

الجوقة : ياحليلي ( تردد في اداء خافت متابعة الراوي)

  الراوي:    خذني بالله انا على اهبة

          قصت اقدار اجنحتي

          وانا في زاوية اتوسد امتعتي

          ينحسر الظل فأمضي للظل الأخر

         لكن الطير مضى عني  لم يفهم ما كنت اغني

         هذا انا وقبل عالمين كنت

         وبعد الف عام اكونه

         هذا عصير الشمس فوق جبهتي

         لن تسلخوا كساء امتي

         هذا الكساء دمعتي

        الان استطيع ان اراه

       قصعة من الحليب

         زهرة تعيش موسم اللقاح

        تموت اذ يدركها الصباح

الجوقة : زهرة تعيش موسم اللقاح

          تموت اذ يدركها الصباح

خليل فرح و وهبةعازف الآكورديون يغنيان

فلق الصباح قولي هاهو نورك لاح خلي

 ياخفيف الروح هو هذا نداك ام ندى الازهار

عازة قومي كفاك نومك انت يا الكبرتوك البنات فاتوك

                في القطار المار

 فلق الصباح قولي  هاهو نورك لاح خلي

 ياخفيف الروح هو هذا نداك ام ندى الازهار

عازة قومي كفاك نومك انت يا الكبرتوك البنات فاتوك

                في القطار المار

الراوي : يا وطني سلمت لي سوف نسافر الى بلاد الحكايات المنسية علنا نجد اصحابنا الذين نساهم الزمان والمكان ، والخلان والشجر ، فلنحلق على بساط الريح ، او ننتعل مراكيبنا

الجوقة : لايهم

 الراوي : سفر على الدواب ، او نحلق مع الطيور

 الجوقة :” لايهم

                   فلنسافر لي ناس الكمبو

                             ناس الخيران

                            ناس الكرتون

                            الناس الدافرة

ريم : الناس المصاقرة الهم

جمال: الكايسة لي حتة ارض سكن وملاذ

وائل : لي فدان عشمانة تخدرو

عادل :الناس الضاحـكـة وشوشها الباكية قلوبها

ناصر : الصاحي همهـأ ونايمة احلامها

الجوقة : الناس الراجية الافندية الناس الراجية الافندية

           واقفة تسند الحيل راجية الأفندية ..

 ((  خليل فرح ووهبة نقرشة على العود))

 وهبة : يا خليل افندي صحي الكلام القالو مستر ماك مايكل

                        صحي حيخلوا البلد للشيوخ والعمد ..

خليل :فعلا قال الكلام ده !

وهبة : والأفندية وين دورهم ؟

خليل : كلام مستر ماك مايكل معقول ومقبول ، انو شؤون القبائل

       والقرى تبقى في ايد الشيوخ والعمد! لكن انت سمعت مستر

         جاكسون قال شنو ؟

وهبة : قال سنو المسنوح ده؟ بعد الكلام الهمش فيهو الأفندية

       تاني عندوكلام ؟

خليل: يا وهبة افندي قال السودانيين عبارة عن اطفال kids andthwill stay kids

وهبة : الخواجات دول نسو انو They will notstay kids,,theywillgrow up sooner or later

عارف يا خليل افندي الأفندية ديل بقو زي المزارعين الضاقوا المرة بعد الجبايات هجم عليهم الجراد ,

خليل: الأفندية بقوا بين نارين بين جمر الطوايف ولهيب الحكومة

وهبة : ما يشدوا الحيل ويبقوا طبقة زي الهنود ولا المصريين

             طبقة الافندية

خليل: كان قدرو طرحو على الحكومة شروطهم

وهبة : فعلا كان وفروا على نفسهم الموقف البايخ البقو فيهو

              متنازعين بين جراد الطوائف وجراد الحكومة .

(( الجوقة تنفلت من تحت الغطاء او التياب والطِرح والعمم المعاهم ويتوجهوا الى الأفندي))

عادل : جايز عندك يا حضرة الافندي مشينا لامن حفينا

وائل: ايادينا اخشوشنت

مازن : اتشققت وشقوقه ربى فيها صرصار الليل

ملاذ : والسحلي والعنكبوت

ريم: والجندب والجراد

عادل: جايز عندك يا حضرة الافندي الجراد ؟

افندي: مالو الجراد ؟

جمال: قمحنا عدم الحواشة الصفقة الخدرة

ناصر: ملعون الجراد

وائل : اليوم الغطى الشمس وقفنا نبحلق في السما زي الهنابيل

مازن : مافضل ليهو بعد اكل الزراعة يرك فيني وياكل قليبي

              الأخدر .

عادل : مافضل غير يشرب من دموعنا نقبل وين يا ناس ؟

وائل: الجراد عدمنا مونة الصيف والشتا

جمال: الجراد قمحنا كمل مزارعنا

عادل: جايزعندك حضرة الافندي الجراد

ريم: اكل فطور ولايداتنا

ناصر : اكل عيش النمل في جحورو

مهند : ورق كراريس المدارس

ملاذ: اكل صفق الحنة

الجوقة: حننا العروس من حمرة دمنا

    (( جمال ينظر في الافق اسراب الجراد قادمة من جديد تصيح الجوقة الجراد  يحاول كل فرد ان يقتل اكبر عدد من الجراد يدخل عليهم الأفندي وهم جلوس على الأرض يقتلوا في الجراد وايقاع ضربهم على الأرض مع كلمات الافندي  ))

افندي: قتلوا الجراد ولا عايزنهم يزيدوكم جباية جديدة ، جباية   الجراد الجراد ده ما بتتكتل ولا كيف ازاي ؟؟عايزنها باردة يا

 مزارعية السجم ( يتوقف الضرب مع اخر جملة )

(( المجموعة تجري خلف الجراد وتستغل كل طرق قتل الجراد ليتحول الامر في النهاية الى لعبة ام برمة الايقاعية تتحول الجوقة الى مجموعة اطفال  ثم تنفلت ملاذ الى خارج دائرة الفعل وتقف منتصبة بشموخ ))

ملاذ: تقف وبتحدي ـ هييييه الجراد ده بلد وهو طاير ؟

وائل : ده عايز جيش عشان نحاربوا !

افندي: كتلواوانتو ساكتين ، نلاقيها منكم ولا من ولا من الجراد

         حكومة بريطانيا حيكون عندها عجز في الميزانية عجز الجراد! قتلو الجراد قتلوا !!

( يعودوا الى حركة قتل الجراد وهم على الارض ويواصلوا الكلام)

ناصر : الجراد سكن مزارعنا

مازن :الجراد دخل بين صفق الشدر

جمال: الجراد دخل بين البصلة وقشرتها

 عادل دخل بين المرة وراجلها

 (الجوقة تتحرك نحوه وهي رافضة لكلامه ) .. لالادي ما ادونا ليها كيف بين الراجل ومرتو ؟؟

 عادل : انا قلت كده ؟

الجوقة : ايوة قلت كده !

عادل : انا قاصد الجراد الجرااااد

الجوقة : عارفين قاصد الجراد

عادل : اصلو امس مرتي دخلت يدها في فستانها ( يحاكيها ويدخل يده في صدره) انا فرحت افتكرتا عايزه تطلع ليها قرش احمر ولا مليم الساعة طلعت ليها جرادة !!! الجراد لقة سكن ونحن ما لاقين جحر

وائل: مليون ميل مربع ونيلين ودشليون نهر وكمين خور وكمين فولة ومحل ما تحفر جمام وما لاقين الشربة !

الجوقة : الشربة ؟ ( ينظروا له باستغراب )

وائل: ما الشربة الانتو فاكرينها ! الشربة!

      (( خليل يغني ..اعبدةماينسى مودتك القلب ولا هو يسلبه

         رخاء ولا كرب  ))

الجوقة: عارفنك انت قاصد الشربة

وائل: ياجماعة انا ما بتاع شربة انتو ما بتعرفوني انا بتاع شربة

عادل : السموحة يا اخوي هم فاكرنك بتاع شربة استغفر الله العظيم

الجوقة:قايلنك بتاع شربة

 وائل: يكاد يبكي انا ما بتاع شربة

( يدخل عليهم الافندي وبصوت عال )

افندي : انا بتاع شربة

البنات : وب علينا سجم خشمي ( يهربن للخلف )

عادل : الشربة يا رجال ( يتحول الجو الى انداية )

افندي : انا ما احرجكم ابدا الشربة يا رجال

الجوقة: انت بتاع شربة ؟؟

افندي : وسفة!

الجوقة: وبتسف ؟

افندي :بسف الحكومة

الجوقة : الحكومة بس؟

افندي : والشعب

الراوي : السف دمك وكان سبب في ها لجرح انشاء الله لاقام لانصح ..

  ( يدخل الدرويش من بعيد وهو يصيح .الله الله )

الدرويش : المافي قلبومحبة ما عندو الحبة ،دنيا العارفين محبة

            والبسقي دنيتو بالريد بجني محبة . والناس العايشة

          لي روحه لا بتريد، لا بتحس، لابتحب، لابتتحبة. بتجني  

         السراب . تجني السراب  السراب

الجوقة : تعال ياحنون تعال اشرب معانا ، خمرة هوانا .(ضحك)

الدرويش : واخلي خمرة القوم خمرة الغرام والمحبة الصافية

            صافي ودنا ودايم هوانا طول الدهر سكران وصاحي

          ابقى زيكم غايب بي خمرة هواكم العكرانة اغيب وعي 

     مع السكارى وانا العمري صاحي وعي بي خمرة القوم نشربا

     على ذكر الحبيب مدامة سكران بها قبل ان تخلق الكرم …

    طول الدهر رهيف الحواس رقيق المعاني رقيق الشوف

    رق الزجاج ورقت الخمر .. فتشابها فتشاكل الأمر

                     فكأنها خمر ولا قدح

                    وكأنها قدح ولا خمر

 ( يهرب بعيدا وهو يطلق صيحته المشهورة )

  الجوقة تنادي عليهو .. تعال ياحنون تعال بينا مافي زعل

(( الجوقة تغني نادوليهو حنوني ومع نهاية الرقصة يودعون الافندي طقس الوداع في الانداية ويستقبلون امونا كابوسي بوعي شديد ))

الجوقة: يا ايها المتشرد النبيل توقف شاركنا الاحلام

عادل: سافرت الى بلاد كثيرة

وائل:اتربيت على ايقاع الطبول ورقصت على نهر جوبا

مازن وجمال: شايل من سحر كايا انزارا

ملاذوريم : مريدي وطمبرة

عادل: شربت الكوجو مورو في اندايات رجال مافي

امونا : في قلب الاماتونج

ريملاذ: احكي لينا امون كابوسي

الجوقة : ايها الشاعر المتجول تربادوور

امونا : يحكي بعربي جوبا ــــ التمساح ساب النيل ورقد على الرملة الباردة تمساح كبير حبس الدرب للناس وقال مافي زولي عدي واي حيوان ينزل الموية بياكلو ومن يومها الحياة توقفت والناس تعبت بقت لاقادرة تنزل تروح لي اشغالها ولاقادرة تاكل اولادها التمساح حبس الدرب وكل غزال ولا غنماية كف اكلها كف ختفها ومرات يرقد تحت اعشاب النيل يطلع عينو وكف يختف اي حاجة داخله الموية تمساح عذب الناس عذاب اولاد المدارس خلو السباحة مع زهرة النيل اها الناس قالت مافي حل غيرر الافندي يخلصه من التمساح راحوا للأفندي ( تتحرك الجوقة في حركة نصف دائرية عابرة الى الافندي الذي يدخل وهو يحمل معه بندقية ويعتلي المدرج ويبقى الشعب تحت )

 الافندي: مالكم في شنو

 الجوقة : التمساح يا حضرة الافندي

افندي : التمساح مالو ؟

 الجوقة : اكل غنمنا كمل اكلنا حبس علينا الدرب

افندي جيبو فلوس عشان نشتري جبخانة

 خلاص جيبو فلوس عشان نشتري جبخانة نقتل التمساح وفعلا كل  يوم نجمع قوروش عشان تمساح يموت افندي ينزل بحر يضرب رصاص التمساح يغوص جوة موية يقعد ساعة ساعتين افندي يتعب يمشي كل يوم نشتري رصاص وندي افندي فلوس

 اها تمساح بقى كبير وافندي بقى كبير تمساح بقى كبير وافندي بقى كبير ونحن بقينا صغار

يتجمعوا ويقفون في انكسار في الوقت الذي يخرج الأفندي مزهوا

غناء الجوقة :

    اب كريق في اللجج   سدر حبس الفجج

 عشميق حبل الوجج     انا اخوي مقلام الحجج

 يا خريف الرتوع    اب شقة قمر السبوع

فووق بيتوو سند الجوع   يا قشاش الدموع

خال فاطمة بلالي

 (الجوقة ترقص رقصة حماس )

جمال : البترقصوا ليها شنو وانتو ماقتلتو نملة! التمساح حي ما مات التمساح حي والتماسيح ملت البلد ملت البلد

مازن: كلكم تماسيح وكلكم اسود

جمال : خلونا نعيش في غابتنا سوا في محبة وسلام

عادل : مافي داع للخلاف والتناحر خلونا يد واحدة سوا

ملاذ: صحي ياجماعة علي عبد اللطيف اتشاكل مع ناس الاتحاد ؟

ريم: هو مش عضو في الاتحاد ؟

جمال: لالالا سيد سليمان كشه قال هو ما معاهم .!

وائل: هو الاتحاد ده بين منو ومنو؟ بين القبائل السودانية ولا اتحاد مع مصر ؟

عادل : الحاجة المتأكد منها ان عبيد ،، كان ثائرا وطاقة وطنية أسس مع ناس توفيق صالح جبريل والامين علي مدني وكشه وعبيد حاج الامين وخلف الله خالد ووخليل فرح ده االقاعد معانا ده الاتحاد .

ملاذ: الاتحاد بتعني شنو ؟ اتحاد مع مصر ؟

جمال : كان كده ..وعلي كان بفتكر انو الاتحاد مفروض في الأول يتم بين القبائل السودانية

خليل : الكلام ده صاح . علي كان عضو في الاتحاد وهو في مدني .و كان صاحب عبيد حاج الامين وكان بتناقش معاهو طوالي عن الاتحاد وقضايا السودان بي ود شديد واحترام ورايو كان انو جماعة الاتحاد حذرين ولابد من عمل مصادم واتفق معه عبيد وكونوا اللواء الأبيض

جمال : وبرضو سليمان كشه رفض الانضمام لجمعية اللواء؟ والسبب انو بفتكر ، علي من ،، الزرقة .

الجوقة:منو الحسب ونسب ! ما كلنا يا اولاد ريف، يامنبتين، ياولاد زرقة ، ولا حمرة، ولا خضرة، ولا قمحة. في النهاية كلنا سودانيية

الدرويش: من البحر شرق ، للتبلدي غرب ،زهرة سنمكا ووينكا

         وسط البلد ، برقصوا تحت التيك والمهوقني ، تترتر             قدامهم جريدة نخل ، وعصن ليمون فوق ليهم الغيمات الملونة راقصة على السما الزرقا الرحيمة فرحانين بي عرس النيل للطين ونحن معاهم نذكر في ذكرنا وانتوا في فرحكم كل ناس صرفوا ليها غنا وايقاع وكلهم فرحهم واحد الوانهم زي زهور بلدي عاملين حديقة وبستان زي جلابيتي .سمرتهم منوراها قلوبهم الياسمين سمر وخدروقمح وحمر وخاتفين لونين وكلهم سودانية

 

 ( علي عبد اللطيف يرفع منشور والجوقة ترفع جرايد وتقف مثل المظاهرة خلف علي عبد اللطيف )

علي: كلنا سودانية واللواء الابيض لكل السودانية من بكرة انشروا اراء واهداف الجمعية واهتفوا فليحيا الوطن ..مافي فرق بين عربي ولا جنوبي كلنا سودانية فليحيا الوطن .. ( تتحول الجوقة الى أعضاء الجماعة وعلي امامهم )

اعضاء الجمعية : فليحيا الوطن

الجوقة : على كل فرد في الجمعية ان لايقل عن اي انجليزي

وائل: تقابل اي انجليزي قول ليهو رايك في وشو

جمال : خلونا حمير، ركبوا على ضهورنا، لونحن رجال اولاد رجال نركبهم حمير الانجليز

ناصر : شاركوا في المظاهرات ولا تخافوا واهتفو فليحيا الوطن

مهند : نموت ويعيش اولادنا حياة افضل ، فليحيا الوطن

عادل :شاركوا رجال ونساء واهتفوا فليحيا الوطن

الجوقة: رجال ونساء اهتفوا فليحيا الوطن

(( غناء خليل فرح ووهبة )) (تقود المظاهرة النساء ..)

  يا ام ضفاير قودي الرسن

     واهتفي فليحيا الوطن

 اصلو موتا في الرقاب

 كان رصاص او كان بالحراب

البدور عند الله الثواب

 البضحي وياخد العقاب

 يالشباب الناهض صباح

 ودع اهلك وامشي الكفاح

قوي زندك وموت بارتياح

فوق ضريحك تبكي الملاح

  (( تتشكل الجوقة مع الأغنية وتتحول الى كتلة مظاهرة ))

 

الجوقة : كيف يحيا وطن ناسوا منقسمين ؟

وائل: انقسموا الأفندية وناس البلد اتقسمو

ناصر: حسب قول الانجليز

ع وج : تجار وعمد ومشايخ ونظار ومكوك

الراوي : طبقة فووووق

هنوايل:صغار الموظفين وصغار التجار وصغار الصغار

الراوي : طبقة وسطى

البنات: وفقرا الفقرا ، فقرا المدن والارياف والقرى

الجوقة: اغلبية

الراوي : لا ليهم عدة عمال ولا عدة مزارعيه

الجوقة اغلبية

الراوي قدر ما يعملوا ما بنولوا غير الكفاف

الجوقة صابرين

الراوي : عمرهم كلوا راجين خير الافندية

  (( يدخل الأفندية ويجلسوا على الطاولة في اجتماع ))

عبيد: البلد دي ما بتقوم ليه قومة الا نتوحد

المطبعجي : المصالح المتناقضة بتخلي الناس تتقسم

صالح : طيب ما نوحد المصالح والجهود

حسين : الناس الطلعت مظاهرات بدل يشجعوهم ، شفت ود البلد العامل فيها خواجة كتب شنو ؟؟

الجوقة : ( تفتح جريدة الحضارة ) تم اذلال البلاد عندما تظاهر اناس منحطين وغير فاهمة ليس لهم وضع في البلاد ، في المجتمع. يسمح لهم بقيادة الرأي العام او التعبير عنه

عبيد : ينقسم الناس الى قبايل واسر ولكل واحد منهم شيخو اولئك هم الناس الذين لهم الحق في الكلام عن البلد. كلام عجيب

     Very odd Extremely odd

الجوقة: اولاد الحسب والنسب ليهم الحق في الكلام عن البلد

         اولاد الناس الناس ليهم الحق في الكلام عن البلد

الراوي : اولاد المصارين البيض والملونة ليهم الحق في الكلام عن البلد

الجوقة : وغيرهم لا لا لا لا

عبيد : وتقول لي نتوحد It is adreem

(( غناء خليل فرح ))

 نيلنا يانيل الحيا حياك حياك الحيا

 يانيلنا ياب ما زلال  ياب شامة في صدرك هلال

  قول للسلف خلفا حلال نتلاقى في جنة بلال

 من برنو للريف اب علال عربان خلا واولاد دلال

 نشابا كلنا يازلال في حضنك اولاد حلال

الأفندية:

عبيد :ياجماعة الناس شغالة كل مجموعة عملت ليها مدرسة وجمعية

الجوقة: اولاد مدني اولاد ابروف اولاد الموردة

عبيد : لالالا حكاية اولاد الموردة دي حكاية عجيبة ، معقولة ناس تأسس وناس تقلع ..؟؟

صالح : اولاد عشري اسسوها ! واولاد الهاشماب قلعوها !

حسين : ديل قالوا الادب قومي وافريقي وديك قالوا الادب عربي

عبيد:فتشوا للقومية النبيلة السودانية عربية ولا افريقية

صالح : ما هو ده البخلي الناس تتقسم كيمان ، الناس شرقت وغربت وقرو غاندي ونهرو والفابين والاشتراكيين ومحمد عبده وهيرتس

حسين : رستوف وماركس الشباب بحثوا في القديم والجديد

عبيد: نادوا بي ادب قومي وفنون سودانية ، واقاموا الندوات ودبجوا المقالات

صالح : وعرضوا المسرحيات بمناسبة المسرحيات ، قالوا ليك الاستاذ عبدالحليم علي طه افندي ؟!

عبيد :مالو؟ مش هو في بخت الرضا؟؟

 حسين  : ايوه  هو في بخت الرضا ,, ديل فايتين الناس مسافة

       في كل مناسبة رواية وفي كل حصة مسرحية

عبيد : والمسرحية موضوعه شنو ؟

حسين : الف رواية اسمها السودان سنة الفين ـ ضحك

 الجوقة : تضحك وتعلق على سنة الفين

  (( ثم يجلسون كانهم يشاهدون سينما ))

حسين : بقول الناس تعيش في بحبوحة من العيش الهني الرغد ، بياكلوا في افخم المطاعم العالمية ، المالية البلد . والموسيقى من حولهم ، والمقاهي بتقدم الشاي والقهوة بي طريقة اجمل من قهوة علي الزيبق ,,. والصفرجية يتكلموا معالك بكل اللغات والنحوي ـ يقلد الصفرجي ـ Excuse me how canihelp you

Would you maind havea cupof tee??

الراوي والجوقة تعليق وضحك

الراوي: المهم في الموضوع انو في سنة الفين بقول الناس متوحدة

 الجوقة:سنة الفين

حسين : كل زول عايش في جنة لاماهم البلد الواسعة متوحدين

الجوقة : سنة الفين

الراوي :اسمعوا كلامي وبطلوا تحلموا خليكم في سنة اربعين اخير ليكم … مجرد اضغاث احلام

الدرويش: سنة الفين وهسي ، واحد. والزمن دوار ، الكان

         زمان خيال بقى حقيقة  والبقى حقيقة في الزمن الجاي ببقى خيال . وكل شئ بي حسن التخيل .ببقى حقيقة.تجلى لي فجلاني لعيني كما لي صورة المرآة تجلو .. الحقيقة خيال والخيال حقيقة الله الله

 عبيد  : خيال فنانين

صالح : وانت خليتنا نحلم ولا نتخيل ؟!

عبيد : ياجماعة الافندية ما يتوحدوا الليلة عشان نعيش حلم بكرة

الافندية : ما نتوحد عشان نعيش حلم بكرة

الجوقة: حلم الافندية مستحيل يتحقق الليلة

وائل: البلد دي التقول فيها غضب والدين . كل ما نقول نتوحد نتفرتق في ثواني

ناصر: ونحن غير الافندية مافي زول بوحدنا

جمال: الافندية الافندية يعني شنوا أفندية ؟

عادل: لقب للاحترام لي موظفين الحكومة الصغار

ريم :جاتنا من وين كلمة افندية ؟

عادل:يونانية لصقت في الاتراك نشرها محمدعلي وبقى يديها للناس الاصغر من باشا وبك يعني دلع لي صغارالموظفين

جمال: ونحن ما بدلعونا ليه ؟ شابكننا الشعب !الشعب كلمة تقيلة بي موية ما بتبلع

مازن: كان يسمونا الصابرين

الجوقة : الشعب

ملاذ:في كل زمان ومكان نحن الغلابا

الجوقة: الشعب

عادل: حكمة ربنا المتوحدين بالكوارث

الجوقة:الشعب

عادل : المستحملين تجارب الحكومات المجغـمسه

الجوقة: الشعب

عادل: البتنزل من السما يتحملا

الجوقة: الشعب

ا(( خليل يغني

نحن ونحن الشرف الباذخ دابى الكر شباب النيل قوم قوم كفاك يانائم شوف شوف حداك يالايم مجدك ولىّ وشرفك ضلّ وامتى تزيد زيادة النيل ده ودعمى وده ضريب دمى وانت شنك طفيلي دخيل يانزلانا امرقوا الذمه كيف ينطاق هوان الامه شالو حقوقنا وزردوا حلوقنا ديل دائرين دمانا تسيل من تبينا قمنا ربينا ما تفاسلنا لو في قليل ما فيش تانى مصرى سودانى نحن الكل ولاد النيل

نحن ونحن الشرف الباذخ دابى الكر شباب النيل قوم قوم كفاك يانائم شوف شوف حداك يالايم مجدك ولىّ وشرفك ضلّ وامتى تزيد زيادة النيل ده ودعمى وده ضريب دمى وانت شنك طفيلي دخيل يانزلانا امرقوا الذمه كيف ينطاق هوان الامه شالو حقوقنا وزردوا حلوقنا ديل دائرين دمانا تسيل ))

الافندية:

حسين :ياجماعة الكلام ده صاح نحن ليه دايما نبدا جسم واحد وننقسم لي قسمين

عبيد : لانو عندنا نيلين وزعيمين وسيدين وغابة وصحرا وهلال ومريخ

صالح : في مشكلة حقيقية بتخلق الانقسام

عبيد : انت ماشي بعيد ليه انت ! ناس عرفات مدرسة الفجر في البداية ما كانت مدرسة الموردة غيروها لي مدرسة الهاشماب

          ليه ؟؟

عبيد : عشان كان معاهم ادوارد عطية

حسين : ادوارد عربي لكن شغال في قلم المخابرات ومافي اي حكمة يكون عضو في جماعة حتنادي بي حريتنا

صالح : ده ممكن يكون سبب لكن السبب الحقيقي القالو حماد توفيق

عبيد : مافي داعي يا افندي

صالح : لا في داعي لانو كان سبب في فقدنا لي كتاب كبار ، الجماعة كان فيها محمد عشري صديق وعبدالله عشري اخوهـو وديل نادوا بي ادب افريقي ادب غير عربي شالوا منهم الجماعة دي الحقيقة this the real reason

عبيد: نحن اولاد الليلة والماضي راح

صالح : راح لكن شال معاهو اتنين من النبلاء السودانيين واحد اعصابوا تلفت والتاني فقد وعيو فقد روحو ورحل

حسين : كان ممكن يعملوا مدرسة تانية

صالح : لكن هم شايفين تحقيق رسالتهم في وحدتهم معاكم

 الجوقة : جعلي وشايقي وزاندي ايش فايداني

           غير خلت اخوي عاداني

           يكفي النيل ابونا والجنس سوداني

عبيد : انا بعـتـقد ان نحن قدمنا لوحة مزيفة عن الوحدة

صالح : قول نجحنا في توصيل رسالتنا .. اننا مهمين

عبيد: مهمين بدون ما نغير في العناصر الأخرى

حسين : الوحدة مش حاجة ساهلة يكفي انو بنسعى ليها

         وكذالك هزيمة الطائفية

عبيد: هيمنة الجيل القديم من الخريجين على لجنة الخمسين الأولى للمؤتمر اثر على تمثيل الطائفية

صالح : والطايفية اغرت افندية يكونوا معاها وده منع الافندية      

           من الظهور كطبقة واحدة

حسين : وده المقصود عشان ما ، نحل محل الطائفية

عبيد: يعني حكومة الانجليز نامت سعيدة ، حجمت المؤتمر

              وخلتومنظمة                                                               

 صالح  : منظمة تعمل بالدستور الوافقت عليهو هي

حسين : ياجماعة ما ننسى المؤتمر بقى ليهو قوة

عبيد: ، فعلا ليهو قوة لكن في ناس بفتشوا لي دعم الطائفية

صالح : حاجة تحير السيد اسماعيل الزهري اتخلى عن السيد عبدالرحمن المهدي وبقى رئيس المؤتمر

حسين : وناس المحجوب اتخلوا عن المؤتمر وبقوا مع السيد عبدالرحمن المهدي

عبيد : والسيد اسماعيل الازهري ساب ده كلو وانضم للسـيد علي مش حاجة تحير

الراوي: ورجعت حليمة لي قديمة نطيط من شجرة لي شجرة والله نحن شعارنا كان مفروض يكون ـ قرد

الجوقة: شعار رقصتو جاهزة ـ القرد القرد ( يرقصوا كقرود )

الراوي : الافندية حافظوا على التوازن وحاولوا بقدر الممكن ان تكون سلبياتهم قليلة حتى لايرمي البعض الفشل عليهم ليوعد الناس بي احلام جديدة

الجوقة: الأفندية راجينكم يالآفندية (اغنية شعبية ومن خلال الرقصة يخرج ممثل ويقول كلامو)

الراوي : خلقوا علاقات احترام مع الخواجات مع مستر استيوارت ومستر ريد ولعبوا لعبة النفس الطويل

الجوقة : حليل الاحترام عبد الله ود جاد الله كسرقلم ماكميك

الراوي : يقيتو تدلعوه ما كميك ماك مايكل لكن اسمعوني جاي الافندية برضو واجهوا الانجليز وسمعوهم الف كلمة فارغة

والف جملة قاسية من نوع تبا لك!!

 ( الجوقة كل واحد فيهم يتنطع بالكلام الانجليزي

( سخرية من كلام الانجليز ))

لكن برضو في النهاية الافندية انعزلوا

عبيد : وفد التفاوض اختاروه من زعماء العشائر والقبايل وسابوا الافندية كيف ما ينعزلوا

صالح : وتضاربت المدارس الثقافية واتعددت باعدوا واضعفوا الافندية

حسين : واختلفت المفاهيم ، مفاهيم القومية واتقلسفوا

        لحدي ما شتتوا واتشتتوا وقدروا فرقوهم وسادوا هم الاعيان وضربوا وحدة العباد والبلاد

عبيد: وانعزلوا الافندية وتلاشوا واندثروا الافندية لنبحث عنهم             

        بين الاثار 

الجوقة: شرقنا وغربنا مشينا شمال وجنوب رجينا الحلول ونحن صابرين في انتظار الافندية

 (( الجوقة تمثل أوضاع لكوارث متعددة وهي تنادي منتظرين الافندية منتظرين الافندية مظاهرات يستشهد فيها الطلاب جوعى شحادين وفيضانات والجوقة تتهاوى ينهضوا من جديد كأن الحياة تدب فيهم يبدا صوتهم يعلوا  ويتصاعد

الدرويش: التجي من السما تتحمله الواطه التجي من البحر

             فيضان  نترس قيفته والتجي من الناس الطواغيت

           نواجه ظلمه نتكاتف نسند الحيل نزيل جهله ونزيد فهمه ونعلي شانا نعلي شانا جينا جينا جينا

الجوقة : جينا من رمال الاسى الابت تنبت لينا خدار .. جينا

           من غابات الحرب الثمارها قنابل والغام . الحرب الشالت

           اجمل مافينا وخلت لينا الجوع الهدالحيل  وملت الارض                    جفاف وخراب ودمار. نزاحم النمل في فتافيت اكلو الخازنو وداخرو للآيام . نلقط رزق اليوم باليوم .

الدرويش : يا من ترزق الطير في سماهو والنمل جوة الارض

            والسمك في عميق البحار بغير حساب اغثني

الجوقة : اغثنا واصلح حالنا املنا رهاب واحلامنا رماد دموعنا

       مالحة على الخدين حارقة متحجرة بين رموش العين

الدرويش : عيوني مفتوحةعلى الحقيقة الحقيقة بتشيل الغفلة

             وتفتح بصيرتنا على وعي الحواس تدينا اليقين ثبتنا على اليقين يامن ترى ولا ترى لا تكلني لنفسي طرفة عين

الجوقة: الجوع كافر والحرب ابوابها مفتوحة على جهنم تحرق

        الاخدر واليابس وبتدفن الصغير قبل الكبير وتشتت الخلق

       على المنافي مكسورين خاطر ومزلولين نفس وجعهم اهات

      وصراخهم انين مليانين بالهواجس والكوابيس

الدرويش:لا حرب لامجاعة يا مغيث لاحرب لامجاعة ماتخلي اقدامنا تمشي حفيانة على الشوك والعقارب وغدر الاحبة نفتش

للامان لاحرب لامجاعة

الجوقة: ما بنقدر على بكاء الاطفال على جوعهم وعلى الاحزان

        البتنهش عقولنا وتزهلل قلوبنا ما بنقدر على مخالب

      الفرقة تفصل لحمنا من عضمنا وتشرزمنا وتشظينا  وتفتفت

    ساسنا من راسنا ولا بنحمل الاخو يقتل اخوهو ولا مناحات

     اماتنا يبكن اولادن بي دموع الطرفة الهميلة ولا حبيبة طوف نجاة وشعرها فارداهو الريح شراع والنيل تحته موجو دموعا تبكي جنديها المجهول ونحن بين الالم والهم والذكريات واجترار الماضي السحيق ننبش صخور العدم نفتش في حكاياتنا اساطيرنا عن الافندية الفهم ، الافندية الوعي ، وعينا غايب

في الركايب في الفرقة الغربة الجوة وبرة ما في عير نخت الايد في الايد ما في غير نخت الايد في الايد  

الراوي : ( بجواره خليل يعزف على العود اغنية وطنية خلفية للكلام ويمكن ان يطلق اه طويلة خلفية للمنلوغ ))

ختو الايد في الايد واتماسكوا للجمهور ان يمسك ايادي بعضهم البعض يتأكد الراوي من اياديهم ) خلو شبابنا يقدموا نفسهم للدنيا بدون ما يكونوا بنتموا لاي قبيلة خلوهم يهزموا مشاعر الفرقة جواهم ويشعروا بوجودهم وطنهم حدادي مدادي في عقلهم في اللحظة ديك بنعرف انو هويتنا وطنا ، ووطنا هويتنا مافينا قبلية ولا طائفية لا جهوية ما كلنا يا اولاد ريف يا منبتين يا اولاد زرقة ياحمرة يا قمحة في النهاية كلنا سودانية

 الجوقة : ما كلنا يا اولاد ريف يا منبتين يا اولاد زرقة يا حمرة ويا خضرة يا قمحة في النهاية كلنا سودانيية….

                                           محمد الـســنـي

 

 

 

 

 

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *